नेपाली क्रिकेट समर्थनका लागि आयो ठूलो खुसीको खबर
काठमाडौं।
आगामी महिना नेपालमा आयोजना हुने एसीसी प्रिमियर कपको डिजिटल अधिकार ओएसआर डिजिटलले पाएको छ । एसीयन क्रिकेट काउन्सिल (एसीसी)ले सोमबार एक विज्ञप्ती जारी गरि एसीसी प्रिमियर कपको नेपालका लागि डिजिटल अधिकार हुने जानकारी दिएको हो ।
यसका अनुसार नेपालभर ओएसआरको युट्युब च्यानलमा प्रत्यक्ष प्रशारण हुनेछ । प्रिमियर कपको टेलिभिजन प्रत्यक्ष प्रशारणको अधिकार कान्तिपुर टेलिभिजनले पाईसकेको छ । प्रतियोगिता वैशाख ५ गतेबाट १८ गतेसम्म संचालन हुनेछ।
प्रतियोगिताका खेलहरु कीर्तिपुरस्थित टियु मैदान र मुलपानीमा रहेको क्रिकेट मैदानमा खेल संचालन हुनेछ ।कुल २४ खेल हुने प्रतियोगिताको फाइनल खेल वैशाख १८ गते टियु मैदानमा आयोजना हुनेछ ।
प्रतियोगितामा १० राष्ट्रको सहभागीता रहने छ । सहभागी १० राष्ट्रलाई दुई समूहमा विभाजन गरिएको छ । समूह ‘ए’ मा आयोजक नेपालसहित मलेसिया,साउदी अरेबिया, कतार र ओमान रहेका छन् । समूह ‘बी’ मा बहराइन, कुवेत, सिंगापुर, हङकङ र युएई रहेका छन् ।
हरेक समूहमा शीर्ष स्थानमा रहने दुई टोली सेमिफाइनल पुग्ने छन् । फाइनलको विजेता टोली एसिया कपका लागि छनोट हुनेछ । एसिया कप आगामी सेप्टेम्बरमा आयोजना हुनेछ ।
यस्तै शीर्ष तीनमा रहने टोली एसिया इमर्जिङ कपका लागि छनोट हुनेछ । नेपालले पहिलो खेल वैशाख ५ गते मलेसियासँग खेल्नेछ ।
प्रारम्भिक नेपाली टोली :
कुशल भुर्तेल, भीम सार्की, आसिफ शेख, प्रतिष जिसी, ज्ञानेन्द्र मल्ल, ललित राजवंशी,रोहित पौडेल, सन्दीप जोरा,कुशल मल्ल, श्याम ढकाल, आरिफ शेख, कमलसिंह ऐरी, दीपेन्द्रसिंह ऐरी, अर्जुन साउद, गुलशन झा, सुर्य तामाङ,सोमपाल कामी, किशोर महतो, करण केसी,देव खनाल, सन्दीप लामिछाने।
नेपालको खेल तालिका –
बैशाख ५ मा मलेसियाविरुद्ध टियु मैदानमा
बैशाख ८ मा ओमानविरुद्ध टियु मैदानमा
बैशाख ११ मा साउदी अरेबियाविरुद्ध मुलपानी मैदानमा
बैशाख १४ मा कुवेतविरुद्ध टियु मैदानमा
